Græn framtíð með grænum vörum

Nýjar grænar vörur hafa litið dagsins ljós og í smíðum er heildstæður grænn fjármögnunarrammi fyrir Arion banka sem verður notaður sem grunnur að enn fleiri nýjum grænum vörum, samskiptum við viðskiptavini um umhverfis- og loftslagsmál og grænni skuldabréfaútgáfu.

Græn innlán – Grænn vöxtur

Í júní 2020 kynnti Arion banki til leiks, fyrstur íslenskra banka, grænan innlánsreikning sem við köllum Grænan vöxt. Grænn vöxtur er sparnaðarreikningur sem er hugsaður fyrir einstaklinga, félagasamtök og fyrirtæki sem vilja leggja sitt af mörkum til umhverfisvænni framtíðar. Reikningurinn er óverðtryggður, óbundinn og því laus til úttektar hvenær sem er. Eitt meginhlutverk banka er að miðla fjármagni frá þeim sem eiga sparnað til þeirra sem þurfa lán og gegna innlán þar mikilvægu hlutverki. Fjármunum sem safnast inn á Grænan vöxt er ráðstafað til vistvænna verkefna í samræmi við umgjörð um græn innlán Arion banka.

Fyrst um sinn voru innlánin nýtt til að fjármagna vistvæn bílalán bankans, þ.e. til að fjármagna kaup viðskiptavina á bílum sem nýta umhverfisvæna orkugjafa og uppfylla ákveðin skilyrði um útblástur. Vegna mikilla vinsælda reikningsins var mögulegt að útvíkka innlánarammann í lok árs og fjármagna fleiri græna eignaflokka en þá höfðu viðskiptavinir bankans lagt samtals rúma fimm milljarða inn á Grænan vöxt. Við bættust verkefni sem snúa að hringrásarhagkerfinu, mengunarvörnum og betri stýringu úrgangs.

CIRCULAR Solutions hefur tekið út umgjörð bankans um græn innlán – sjá álit CIRCULAR. Fyrirtækið gegnir hlutverki óháðs aðila og mun árlega gera úttekt á því hversu vel þau verkefni sem fjármögnuð hafa verið uppfylla skilyrði umgjarðarinnar. Einnig metur CIRCULAR umhverfisáhrif Græns vaxtar.

Með því að leggja sparnaðinn inn á Grænan vöxt styðja viðskiptavinir og Arion banki sameiginlega við heimsmarkmið Sameinuðu þjóðanna um sjálfbæra þróun númer sjö, níu, ellefu, tólf og þrettán.

Stofna reikning fyrir Grænan vöxt

Áhrifagreining fyrir Grænan vöxt

Það veitir innblástur og hvatningu til að gera stöðugt betur að sjá hversu jákvæð áhrif það hefur á umhverfið að lána til grænna verkefna. Með grænum innlánum Arion banka, Grænum vexti, leggja viðskiptavinir svo sannarlega sitt af mörkum til framtíðar.

Heildarinnstæða Græns vaxtar var kr. 5.111.603.279 þann 31.12.2020.

Allar innstæður voru notaðar í fjármögnun verkefna sem skilgreind eru í umgjörð bankans um græn innlán. Áætluð losun gróðurhúsalofttegunda sem komið var í veg fyrir með fjármögnun þessara verkefna er rúm 22 þúsund tonn CO2í árið 2020. Það samsvarar árlegri losun um 10 þúsund bifreiða sem ganga fyrir jarðefnaeldsneyti. Saman látum við góða hluti gerast.

Græn bílalán – engin lántökugjöld

Viðskiptavinir greiða engin lántökugjöld við fjármögnun bíla sem ganga eingöngu fyrir rafmagni eða öðrum 100% endurnýjanlegum orkugjöfum. 50% afsláttur er af lántökugjöldum við fjármögnun annarra vistvænna bíla sem nota að hluta til endurnýjanlega orkugjafa og að hluta til jarðefnaeldsneyti og eru með minni útblástur en 99 g/km í vegið CO2 gildi.

Græn íbúðalán – umhverfisvottað húsnæði

Sú nýjung var kynnt í október 2020 að viðskiptavinir Arion banka sem festa kaup á umhverfisvottuðu húsnæði fá 100% afslátt af lántökugjaldi. Um er að ræða húsnæði sem hefur fengið eftirtaldar vottanir: Svansvottun, BREEAM - Very Good og LEED Gold. Um var að ræða nýjung á íslenskum fjármálamarkaði en afar lítið er um að íbúðarhúsnæði sé vottað hér á landi. Markmiðið með grænu húsnæðislánunum er að hvetja til frekar uppbyggingar á umhverfisvænu og vottuðu íbúðarhúsnæði.

Eignastýring fagfjárfesta

Eignastýring fagfjárfesta innleiddi árið 2018 verklag ábyrgra fjárfestinga í starfshætti sína sem felur í sér að við eignastýringu er horft til þriggja grunnþátta sjálfbærni; umhverfis, félagslegra þátta og stjórnarhátta (UFS). Síðastliðin ár hefur eignastýring fagfjárfesta unnið að greiningu á ófjárhagslegum upplýsingum á innlendum skráðum félögum á Aðallista Kauphallarinnar með góðum árangri. Sjá nánari upplýsingar hér.

Áhersla á heimsmarkmið Sameinuðu þjóðanna og Parísarsamkomulagið

Í september 2019 gerðist Arion banki aðili að meginreglum Sameinuðu þjóðanna um ábyrga bankastarfsemi, Principles for Responsible banking (PRB), sem mótaðar voru af UNEP FI og 30 alþjóðlegum bönkum. Með reglunum er lögð áhersla á að tengja starfsemi banka við mikilvæg alþjóðleg markmið og skuldbindingar á sviði sjálfbærni, eins og heimsmarkmið Sameinuðu þjóðanna um sjálfbæra þróun og Parísarsamkomulagið. Arion banki var í hópi þeirra fyrstu til að lýsa yfir stuðningi við meginreglurnar og var þar í hópi um 130 banka frá 49 löndum.

Til að aðlaga stefnu okkar að meginreglum PRB og markmiðum Parísarsamkomulagsins samþykkti stjórn bankans í lok árs 2019 nýja metnaðarfulla umhverfis- og loftslagsstefnu og markmið sem er ætlað að styðja enn frekar við þau áform Arion banka að vera til fyrirmyndar í umhverfis- og loftslagsmálum. Jafnframt samþykkti framkvæmdastjórn bankans sex heimsmarkmið í ársbyrjun 2020 sem bankinn mun leggja áherslu á. Nánari upplýsingar um framgang innleiðingarinnar má finna í PRB framvinduskýrslu.

Umhverfis- og loftslagsstefna Arion banka

Við viljum vera til fyrirmyndar í umhverfis- og loftslagsmálum og lágmarka neikvæð umhverfisáhrif starfseminnar og losun gróðurhúsalofttegunda. Loftslagsbreytingar af mannavöldum eru ein stærsta áskorun samtímans og við viljum leggja okkar af mörkum svo Ísland geti staðið við skuldbindingar sínar gagnvart Parísarsamkomulaginu og öðrum innlendum og alþjóðlegum umhverfis- og loftslagssáttmálum, m.a. um að halda hlýnun jarðar vel innan 2 gráða, helst innan 1,5 gráða.

Bankar gegna lykilhlutverki í því að fjármagna framfarir og Arion banki vill vera hreyfiafl til góðra verka. Við beinum sjónum okkar að fjármögnun verkefna sem snúa að sjálfbærri þróun og grænni innviðauppbyggingu og munum meta lánasafn bankans út frá grænum viðmiðum og setja okkur metnaðarfull markmið í þeim efnum.

Við gerum þá kröfu til okkar birgja að þeir taki mið af umhverfis- og loftslagsáhrifum í sinni starfsemi. Þegar við veljum á milli sambærilegra tilboða frá birgjum munu loftslags- og umhverfissjónarmið ráða ákvörðun okkar. Markmið bankans er að draga úr losun kolefnis og annarra gróðurhúsalofttegunda sem hlýst af eigin starfsemi um a.m.k. 40% fyrir árið 2030 og kolefnisjafna alla þá losun.

Við setjum okkur markmið og birtum árangur hvað varðar þá þætti sem við höfum mest áhrif á, svo sem innkaup, eigin rekstur og þjónustu við viðskiptavini. Með markvissum hætti munum við auka þekkingu starfsfólks á umhverfismálum og styðja við vegferð viðskiptavina okkar í átt að grænni framtíð í samræmi við heimsmarkmið Sameinuðu þjóðanna um sjálfbæra þróun.

Markmið samþykkt af stjórn í lok árs 2019 og staða markmiða 31.12.2020

Á árinu 2020 munum við meta lánasafn bankans út frá grænum viðmiðum og setja okkur markmið í þeim efnum.

Staða: Vinnan við að meta lánasafn bankans gekk vel á árinu 2020 og sýndi niðurstaða greiningar að á bilinu 20-30% lána fyrirtækjasviðs geti flokkast sem græn. Stefnt er að því að ljúka vinnu við grænan fjármögnunarramma á árinu 2021. Þegar sá rammi liggur fyrir getum við sett okkur mælanleg markmið um hvernig við aukum hlut grænna lánveitinga.

Á árinu 2020 munum við setja okkur stefnu hvað varðar lánveitingar til einstakra atvinnugreina með tilliti til loftslags- og umhverfissjónarmiða.

Staða: Þegar grænn fjármögnunarrammi verður tilbúinn munum við vinna að því að setja stefnu um einstakar atvinnugreinar. Útlánastefna bankans var uppfærð árið 2020 og aukin áhersla lögð á sjálfbærni.

Frá árinu 2020 munum við spyrja okkar helstu birgja um umhverfis- og loftslagsáhrif af þeirra starfsemi.

Staða: Í ársbyrjun 2020 var nýtt birgjamat innleitt og allir stærstu birgjar bankans sem gerðir hafa verið útvistunarsamningar við fóru í gegnum matið. Þá var byrjað að spyrja nýja birgja um frammistöðu þeirra varðandi jafnréttismál, vinnurétt og umhverfis- og loftslagsmál. Í lok árs 2020 voru samþykktar siðareglur fyrir birgja sem verða innleiddar á árinu 2021.

Fyrir árslok 2022 ætlum við að meta kolefnisspor lánasafnsins og í framhaldi af þeirri vinnu setja okkur markmið um hvernig við getum dregið úr sporinu til ársins 2030 í samræmi við markmið Parísarsamkomulagsins.

Staða: Ekki hafið.

Frá og með árinu 2023 mun bankinn ekki kaupa inn bíla nema þeir noti 100% endurnýjanlega orkugjafa.

Staða: Við höfum þegar rafvætt hluta bílaflota okkar en enn sem komið er nota ekki allir bílar bankans 100% endurnýjanlega orkugjafa.

Við ætlum að koma hlutfalli flokkaðs úrgangs í rekstri bankans í 90% fyrir árið 2023.

Staða: Vegna mistaka við flokkun og ferli úrgangs vegna framkvæmda í höfuðstöðvum á árinu 2020 fór flokkunarhlutfall bankans niður um tæp 33% á árinu. Unnið verður í því að bæta ferlið á árinu 2021 og við stefnum áfram á 90% hlutfall fyrir árið 2023.

Markmið bankans er að draga úr losun kolefnis og annarra gróðurhúsalofttegunda sem hlýst af eigin starfsemi um a.m.k. 40% fyrir árið 2030 og kolefnisjafna alla þá losun.

Staða: Samdráttur í losun bankans í eigin starfsemi, það er vegna húsnæðis og bíla, er 34,7% frá árinu 2015 sem er viðmiðunarár bankans. Bankinn hefur gert samning við Kolvið um kolefnisbindingu á móti losun í starfsemi bankans og annarrar losunar, svo sem flugferða, leigubílaferða, sorps og samgangna starfsfólks til og frá vinnu.

Helstu þættir í umhverfisuppgjöri Arion banka fyrir árið 2020

Hér má sjá helstu niðurstöður í umhverfisuppgjöri ársins 2020. Ítarlegar niðurstöður uppgjörsins má finna í töflu fyrir ófjárhagslegar upplýsingar.

Ófjárhagslegar upplýsingar

Heildarlosun gróðurhúsalofttegunda í eigin rekstri, þ.e. vegna bifreiða og húsnæðis, hefur eins og áður segir dregist saman um 34,7% frá árinu 2015 (umfang 1 og 2). Þar af hefur heildarlosun vegna bifreiða dregist saman um 55,4,% og vegna húsnæðis um 15,8%. Helsta tækifærið í rekstri bankans til að draga enn frekar úr losun er að hætta alfarið kaupum á eldsneyti fyrir bíla. Bankinn mun ekki kaupa inn bíla nema þeir noti 100% endurnýjanlega orkugjafa frá og með árinu 2023 og er það liður í að draga úr losun í eigin rekstri um a.m.k. 40% fyrir árið 2030.