Hlutir og hluthafar

Stærstu hluthafar

Nokkrar breytingar urðu á eignarhaldi bankans á árinu. Hluthafar sem mest juku eignarhald sitt í bankanum voru Lífeyrissjóður verzlunarmanna um 3,79 prósentustig, Lífeyrissjóður starfsmanna ríkisins um 2,56 prósentustig og Birta lífeyrissjóður um 1,51 prósentustig. Hluthafar sem minnkuðu mest hlut sinn voru Lansdowne Partners um -3,91 prósentustig, Goldman Sachs International um -3,72 prósentustig og Sculptor Capital Management um -3,41 prósentustig.

Í árslok 2020 var Taconic Capital stærsti hluthafi í Arion banka með 23,22% eignarhlut. Gildi lífeyrissjóður var annar stærsti hluthafi bankans með 9,92% eignarhlut.

Heimild: Modular Finance

Í lok árs 2020 voru rúmlega 62% hluthafa íslensk. Aðrir hluthafar voru fyrst og fremst frá Bretlandi, Bandaríkjunum, Þýskalandi og Svíþjóð. Heildarfjöldi hluthafa bankans var um 7.400 í lok árs. 

Eignarhald - landaskipting

Heimild: Modular finance

Hlutabréfaviðskipti og árangur

Á fyrsta ársfjórðungi 2020 mátti sjá mikla lækkun á hlutabréfum bankans sem fyrst og fremst má rekja til óvissu vegna COVID-19 faraldursins. Sú lækkun gekk til baka þegar leið á árið en hlutabréf hjá Nasdaq Iceland hækkuðu um rúmlega 10% á árinu og SDR hjá Nasdaq Stockholm lækkuðu um rúmlega 8%. Mismuninn má fyrst og fremst rekja til veikingar íslensku krónunnar gagnvart þeirri sænsku.

Meðalvelta á árinu 2020 með hlutabréf bankans og SDR lækkaði frá fyrra ári. Meðalvelta á dag var um 4,24 milljónir hlutabréfa og um 650 þúsund SDR eða um 4,9 milljónir samtals samanborið við um 6,7 milljónir árið 2019.

Þróun hlutabréverðs Arion banka og valinna meðalstórra (mid cap) banka á Norðurlöndum og bankavísitölu í Evrópu

Ef verðþróun hlutabréfa og SDR á árinu er borin saman við valda skráða banka af svipaðri stærðargráðu (mid cap) má sjá að þróun hlutabréfaverðs Arion banka kemur nokkuð vel út. Innlend hlutabréf Arion banka hækkuðu mest á árinu en færa má rök fyrir því að verðþróun heimildarskírteina bankans í Svíþjóð sé betri samanburður þar sem árangur þeirra endurspeglar einnig veikingu íslensku krónunnar á árinu. Árangur Arion banka og samanburðabanka kemur jafnframt mun betur út heldur en evrópska bankavísitalan (STOXX EUROPE 600 Banks)